Querémosnos vives.

Alcuérdome del ruxíu de les máquines
trabayando ensín parar,
como nós

alcuérdome del dolor
que sentíen les manes
de toes aquelles muyeres,

eses manes que dempués
cuidaben de los sos fíos
que-yos texíen suaños
que-yos alimentaben

eses que ficieron hestoria

alcuérdome del soníu de los homes
atrancando puertes
atrancando vides

alcuérdome entós de la sangre
corriendo poles venes
pola piel
pola cai,

alcuérdome de toes aquelles muyeres
que morrieron por nós
de toes aquelles
que puxaron pol futuro
pol nuesu,

Nós somos les fíes y les nietes
de toles que llucharon
que entá lluchen
polos nuesos derechos
pola igualdá
pola llibertá
pola vida,

alcuérdome de toes les muyeres
qu'antes y agora

ficiéronme creer en mi mesma

igual y llibre.

Oxalá

Desearía que me falaras de ti
de mi
de toos
de naide

que los tos güeyos color tierra
miráranme de la mesma manera
que mires la mar
cómplice
de los tos pensamientos
de las tos alcordances

que los tos güeyos color galerna
miráranme cola revolución
que lleves dientro
puxando por nós
ensín pena y decepción

Prestaríame tar ellí
vete caminar pela sablera
col ruxíu dalgún mar llonxanu
que moyara les tos güelgues

vete llibre
firme
independiente
fuerte
lluchadora

ensín preocupate
ensín mieu
entá viva

Desearía nun sentir falar más
de opresión
violencia
y muerte

desearía sentir falar
de cambiu
igualdá
y vida

Ochocientos kilómetros, N'asturianu

Recoyístite'l pelu y yo aprendí a interpretate. Dexasti la espalda desnuda, desprovista d'armes, como a mi la primer nueche. Agora'l sol ambura mientres la sablera relluma sobre la to piel.

El calor del branu quemaba. 

                                             Quemabes.

                                                               Quemábesme per dientro cola mirada. 

Ríes al son de la mar

                                 y rompíes como ruempen les foles na vera.

                                                                                                     Rompíesme tamién a mi colos tus afalagos.

Movíeste al ritmu impuestu pol vientu de llevante, 

                                                                                   pero yo soi la mar n'aselu.

Me manques.

Máncanme les tos maníes, 

máncanme las tos miraes,

máncame la to risa,

máncame la to piel,

esa que baña agora la lluvia

a ochocientos kilómetros de llevante.

Me manques,

máncanme

los tos ochocientos kilómetros

y máncame

                   la to ausencia.

El mio país.

El mio país
ye'l verde de los sos güeyos,
esi nel que crecen montes


tan altos como les sos piernes.

El mio país

ye la borrina que m'atrapa,
cada nueche,
entre les sábenes de la so cama.

El mio país
ye la lluvia que resuena
nes sableres de la so sorrisa.

El mio país
ye la galerna que guarda,
bien adientro,
corriendo poles sos venes.

El mio país
ye la seronda del so pelo,
marrón,
como les fueyes
que mueve na so alma.

El mio país
ye ella,
sabor a mar
a tierra verde,
a fríu azul.